Unu libru fotogràficu pro contare s’istòria de s’ospidale

S’ispidale de s’Ogiastra”, unu libru fotogràficu pro contare s’istòria de s’ospidale

Intre is fainas prevìdidas dae su progetu “Su sardu in corsia” ddoe est fintzas realizatzione de su libru fotogràficu “S’ispidale de s’Ogiastra”, unu volùmene dedicadu a s’istòria de s’Ospidale Nostra Sennora de sa Mercede de Lanusè e a is chi, is annos, ant contribuidu a sa crèschida de s’istrutura sanitària.

Su libru at a regòllere imàgines istòricas chi documentant s’evolutzione de s’ospidale in su tempus. Cada  fotografia at a èssere publicada cun una didascalia informativa e curiosidades, oferende de custa manera una narratzione visiva de s’istòria ospedaliera de s’Ogiastra.

Un’atentzione particulare s’at a dedicadare a is mèigos e a is operadores sanitàrios chi ant  traballadu in s’istrutura, cun sa punna de avalorare su contributu professionale e umanu de is chi ant postu sa vida issoro a  servìtziu de sa comunidade.

Su progetu s’artìculat in duas fases printzipales: una primu fase dedicada a sa chirca e a sa regorta de is materiales, a traessu de intervistas, cuntatos cun testimòngios e recùperu de informatziones istòricas; una segunda fase dedicada a sa progetatzione gràfica, a s’impaginatzione e a sa preparatzione de su volùmene pro s’imprenta.

A s’agabbu de su traballu, su libru s’at a presentare a su pùblicu e s’at a carrigare in su giassu de sa ASL, a manera chi sa memòria istòrica de s’ospidale e su patrimòniu documentàriu regortu siat a disponimentu de totus.

In custu primu nùmeru de su periòdicu “Noas dae s’ispidale” publicamus in anteprima una de is fotografias chi ant a èssere postas in su volùmene. In custa foto de s’agabbu de is annos Sessanta, est presente sa sig. Maria Assunta Marci (Irbono, classe 1940) in su repartu de ostetrìcia de s’ospidale, paris cun Suor Leonide.

Sa fotografia contat unu momentu de sa vida fitiana de s’istrutura. S’Ospidale Tzivile de Lanusè, intradu in funtzione in su 1957, finas a su mese de argiolas de su 1969 dd’aiant gestidu is Mòngias de sa Mercede, est pro cussu chi s’istrutura est intitulada a Sennora Nostra de sa Mercede.

In cust’àtera fotografia de su matessi perìodu, semper Maria Assunta Marci paris cun Suor Venanza.

Ulteriori informazioni

Ultima modifica