Elisucursu, agiudicada sa gara regionale pro servìtziu HEMS 2027-2035
Agiudicada sa protzedura de gara regionale pro s’afidamentu de su servìtziu de elisucursu HEMS (Helicopter Emergency Medical Service) de sa Sardigna pro su perìodu 2027-2035.
Sa Tzentrale Regionale de Cumandu de sa Regione Sardigna at dispostu s’agiudicatzione in favore de sa sotziedade Airgreen Srl, a s’agabbu de sa protzedura de evidèntzia pùblica acumprida segundu su critèriu de s’oferta econòmica prus cumbeniosa
S’intrega est unu passàgiu istratègicu pro garantire sa continuidade e su cunsolidamentu de unu de is servìtzios prus de importu de sa rete regionale de s’emergèntzia-apretu, assegurende sa cobertura operativa de su sistema de elisucursu a sustennu de is fainas de AREUS (Azienda Regionale de s’Emergèntzia Apretu de sa Sardigna) pro su perìodu 2027-2035.
«Bolimus fraigare unu servìtziu de elisucursu modernu, istàbile e programadu pro unu perìodu longu», at declaradu sa presidenta de sa Regione Sardigna e assessora de sa Sanidade ad interim Alessandra Todde.
«Semus faeddende de unu presìdiu essentziale pro su deretu a sa salude de is tzitadinos, massimamente in is àreas internas, in tretos prus isulados e in totus is situatziones in ue su brontu de s’interventu podet fàghere sa diferèntzia», at agiuntu Todde. «Cun custu afidamentu ponimus in seguridade unu servìtziu istratègicu de sa rete de s’emertgèntzia-apretu e garantimus a AREUS is trastos pro sighire in s’afortimentu de su sistema regionale, puntende in calidade, efitzèntzia e continuidade de agiudu».
Sa gara, de prus de 165 milliones de èuros, dd’at gestida dae sa Tzentrale Regionale de Cumandu pro dèlega de sa Regione Sardigna, in intro de is indiritzos definidos dae sa Giunta regionale pro s’evolutzione de su servìtziu de elisucursu.
S’intrega noa at a permìtere de sighire s’afortiamentu de sa rete HEMS regionale, chi a règimene at a èssere partzida in bator bases operativas, garantende livellos artos de calidade, seguridade e prontesa de is interventos in totu su territòriu de sa Sardigna, prus che totu in is àreas internas e a is logos prus malos a ddoe lòmpere.
Ultima modifica