Martina Lisai est sa diretora noa de su Prontu Sucursu de Lanusè

Martina Lisai est sa diretora noa de su Prontu Sucursu de s’ispidale de Lanusè. Sa professionista at pigadu sa ghia de s’istrutura a pustis de àere bintu u cuncursu de ARES Sardegna.

Una diretora noa est arribada a sa ghia de su Prontu Sucursu de s’ispidale de Lanusè: est sa dotora Martina Lisai, chi custa mangianu at firmadu su contratu chi ufìtzializat su cumintzu de sa diretzione sua, in presèntzia de su diretore generale de s’ASL Ogliastra, Andrea Fabbo. Martina Lisai at assùmidu s’incàrrigu a pustis de àere bintu su cuncursu bandidu dae ARES Sardegna pro s’azienda sòtziu-sanitària de s’Ogiastra.

Arthanesa, sa dot. a Lisai tenet un‘acàpiu forte e dae meda annos cun sa sanidade de su territòriu. Laureada in Casteddu in Meighina e Chirurgia in su 2003 e espetziializada in Meighina Interna cun indiritzu de urghèntzia in su 2009 in sa matessi universidade, at cumintzadu sa carriera professionale in su Prontu Sucursu de s’ispidale Santu Frantziscu de Nùgoro, in antis de àere bintu, in su 2010, su cuncursu chi dd’at portada a cumintzare s’esperièntzia professionale sua a Lanusè, acanta at prestadu servìtziu de sighidu pro seighi annos.

Lisai at cumpletadu su perfilu de istùdios cun unu master in Management pro diretore de istrutura cumplessa, otènnidu in su 2013 in s’Universidade Carlo Cattaneo de Castellanza.

«Donate una ghia istàbile e calificada a su Prontu Sucursu pro nois fiat una cosa pretzisa – at naradu Andrea Fabbo, diretore generale de s’ASL Ogiastra –. Sa firma de sa dotora Lisai no est suna garantzia de istabilidade ebbia, cunsiderada sa connoschèntzia manna tenet de s’istrutura e de is dinàmicas internas suas, ma rapresentat fintzas una base firma e forte pro una programatzione prus eficatze e pro su mellioramentu de s’apretu-urghèntzia in Ogiastra».

Tra is prioridades sa dot.a Lisai at individuadu duos pilastros fundamentales.

«Sa primu punna mia est de puntare a creare percursos de formatzione professionale de livellu artu pro su personale sanitàriu nostru – ispiegat –. So cumbinta chi sa formatzione siat un’istrumentu fundamentale chi nos permitit de èssere in manera reale autònomos e de gestire cale si siat apretu in seguresa totale.

In prus de is cursos obligatòrios tzertificados dae ARES, mi diat pràghere a fàghere atividades de agiornamentu in intro de unu programa de formatzione contina interna a s’azienda, paris cun is àteros professionistas chi partètzipant a s’apretu-urghèntzia, comente reanimadores, radiòlogos, chirùrgicos, ortopèdicos e cardiòlogos. Diat èssere unu percursu ùtile meda pro cumpartzire is evidèntzias iscientìficas e is cumpetèntzias prus atuales».

«In prus – sighit sa diretora noa – bògio traballare pro sa creatzione de percursos diagnòsticos-terapèuticos lestros e àgiles, isviluppados in sinergia cun is àteras istruturas de s’ispidale. S’obietivu est chi su patziente no abarret oras in Prontu Sucursu ispetende consultos o atzertamentos: depimus codificare protòcolos lineares chi siant is pròpios pro totus, indipendentemente dae su turnu de servìtziu.

Custa manera de traballare at a incurtzare is tempos e at a fàghere crèschere meda su livellu de seguresa e de eficàtzia de is rispostas nostras».

Ulteriori informazioni

Ultima modifica