Aspirina e dieta pisco-vegetariana
Paris megiorant sa salude de s’istentina
Un’istùdiu ghiadu dae s’Istitutu de biologia e biotecnologia agrària de su Cussìgiu natzionale de is chircas (Cnr-Ibba), in collaboratzione cun s’Universidade de Florèntzia, at dimustradu chi una dieta pisco-vegetariana, rica de pische, berduras e alimentos de orìgine vegetale, assotziada a s’àtzidu acetilsalicìlicu (aspirina), megiorat sa salude de s’istentina e prevenit sa pesadura de protzessos infiammatòrios, in manera potentziale ligados a s’isvilupu de tumores de su colon-retu, sa segunda càusa de morte pro cancru a livellu globale (IARC, 2022).
Publicada subra de sa rivista “Scientific Reports”, sa chirca sighit unu filone de istùdios giai aviadu acanta s’Istitutu, chi aiat evidentziadu su ruolu crae de su microbiota de s’istentina comente a mediatore de is efetos de sa dieta subra de s’arriscu de isvilupare su tumore de su colon-retu. S’istùdiu cunfirmat s’importu de s’alimentatzione in sa modulatzione de is comunidades microbiòticas de s’istentina e in s’isvilupu de su cancru colon-retale, sutaliniende fintzas s’efetu cumbinadu de dieta e tratamentu farmacològicu (aspirina).
In particulare, sunt istados analizados is efetos de una dieta pisco-vegetariana in modellos animales in manera genètica predispostos a su tumore de su colon-retu. Is resurtados ant ammustradu una significativa reduida de sa formatzione de tumores de s’istentina a livellu de su colon-retu, in manera parallela a is cambiamentos de su microbiota de s’istentina. Custu fenòmenu est istadu galu prus marcadu cando sa dieta est istada assotziada a s’àtzidu acetilsalicìlicu (aspirina), meighina nòdida pro is propiedades suas antinfiammatòrias e preventivas in is cunfrontos de diversas patologias crònicas.
S’anàlisi de su microbiota de s’istentina, s’ecosistema mannu de microrganismos chi bivet in s’intestinu nostru e acumprit unu ruolu detzisivu in sa salude umana, at riveladu unu datu interessante in manera piessigna. S’istùdiu dimustrat chi sa dieta pisco-vegetariana favorit sa crèschida de grupos batèricos nòdidos pro sa produtzione de metabolitas bonos pro sa capatzidade issoro de mantènnere s’echilìbriu de s’ambiente de s’istentina. Fintzas s’aspirina at dimustradu de influentzare su microbiota, seletzionende ispetzìficos batèrios in manera potentziale interessados in is efetos amparadores osservados, che a su gènere Roseburia, produtore de butirradu, una sustàntzia fundamentale pro su benèssere de sa mucosa de s’istentina e pro su controllu de s’inframatzione.
“Is resurtados nostros cunfirmant chi su microbiota de s’istentina rapresentat unu puntu de addòbiu detzisivu intre alimentatzione e salude”, ispiegat Carlotta De Filippo, ricercadora de su Cnr-Ibba e moderadora de s’istùdiu. “Cumprèndere s’interatzione intre dieta, meighinas e microbiota nos at a permìtere de isvilupare in su benidore istrategias de preventzione prus eficatzes e personalizadas, mescamente pro is pessones a arriscu prus mannu de isvilupare custa maladia”.
Sa preventzione de su tumore de su colon-retu dipendet, tando, fintzas de is sèberos alimentares fitianos. “S’istùdiu sugerit chi, in benidore, sa cumbinatzione de dietas miradas e interventos capatzos de modulare su microbiota diat pòdere devènnere unu trastu importante de sa meighina de pretzisione pro sa preventzione oncològica”, concruit De Filippo.
Ant contribuidu a sa chirca fintzas Sofia Chioccioli, ex dotoranda de su Dipartimentu Neurofarba de s’Universidade de is Istùdios de Florèntzia e como ricercadora in su Meyer Children’s Hospital; Giovanna Caderni, Professore Assotziadu de su Dipartimentu Neurofarba de s’Universidade de is Istùdios de Florèntzia; Niccolò Meriggi de su Cnr-Ibba; Mariela Mejia Monroy, dotoranda in s’Universidade de Siena e assotziada a su Cnr-Ibba; Sonia Renzi e Benedetta Cerasuolo de su Dipartimentu de Biologia de s’Universidade de is Istùdios de Florèntzia.
Artìculu de su Cnr-Ibba leadu dae “Le Scienze“, versione italiana de “Scientific American“.
Ultima modifica