Controllu preventivu neonatale pro sa SMA a indonu
Sa Sardigna at aviadu su programa de controllu neonatale pro s’Atrofia Musculare Ispinale (SMA), chi giai dae su 18 de maju est fatu a in donu a totu is criaduras sardas.
Sa Sardigna at aviadu su programa de controllu neonatale pro s’Atrofia Musculare Ispinale (SMA), chi giai dae su 18 de maju est fatu a in donu a totu is criaduras sardas. Un’oportunidade de salude importante meda pro is prus de 6.500 pipios chi cada annu naschent in s’Ìsula, in ue su pesu de is maladias raras, mescamente de orìgine genètica comente a custa, est artziende in manera piessigna.
Is primos campiones de sàmbene sunt giai arribbados a su Laboratòriu de Controllu Neonatale de s’Ispidale Pediàtricu Microtzìtemicu “A. Cao” de Casteddu de s’Arnas G. Brotzu, responsàbile su dotore Angelico Lampis.
“Finas a pagos annos a oe pro sa Sma no esistiant terapias in gradu de nde modificare su decursu – ispiegat Salvatore Savasta, diretore de su Tzentru de Coordinamentu Regionale pro is Maladias Raras de sa Sardigna e de sa Clìnica Pediàtrica e Maladias Raras de s’Universidade de Casteddu – Oe sunt disponìbiles tratamentos innovativos capatzos de cambiare s’istòria naturale de sa maladia. Sa possibilidade de individuare in manera primidia is criaduras malàidas, prima chi si manifestent is sìntomos, aberit a sèberos terapèuticos chi finas a unos cantos annos a oe no fiant imaginàbiles. Is terapias noas in manera primidia printzipiadas, oe cunsentint a pipios medas de cròmpere is normales tapas de s’isvilupu motòriu, in tempos paragonàbiles a cuddos de is fedales non malàidos”.
“Sa Regione Sardigna est istada intre is primas in Itàlia a deliberare e finantziare su controllu pro custa patologia cun fundos pròpios – ispiegat su Professore Savasta –. Pro custu disìgio ringratziare a sa Regione Sardigna, a is Diretores de is tzentros nàschida chi ant collaboradu, ma fintzas a totus is Assòtzios de malàidos e s’Osservatòriu Maladias Raras (OMAR) chi ant acumpangiadu cun atentzione su protzessu chi at giutu a custu resurtadu. Como chi est istada cròmpida custa tapa fundamentale s’obietivu est su de costruire unu percursu cumpletu de presa in càrrigu inoghe in s’Ìsula e prevìdere s’ampliamentu”.
Ultima modifica