Dae Domo de sa Salude a Domo de Comunidade

In intro de su prus ampru assentu de s’assistèntzia territoriale prevìdidu dae su DM 77 e finantziadu cun is risursas de su PNRR – Missione 6 Salute, peri sa Domo de sa Salude de Lanusè (Casa della Salute) como si narat Domo de Comunidade (Casa di Comunità).

Non si tratat de unu simpre càmbiu de nùmene, ma de un’evolutzione sustantziale de su modellu de agiudu, pensadu pro ofèrrere unu puntu de riferimentu fìsicu, ùnicu e de atzessu fàtzile a is tzitadinos chi bisòngiant de servìtzios sanitàrios e sotziosanitàrios.

S’interventu s’insertat in un’istrategia cumplessiva de afortiamentu de s’assistèntzia territoriale, in integratzione cun is Ispidales deComunidade e is Tzentrales Operativas Territoriales, cun sa punna de megiorare is percursos de cura e allebiare sa pressione in is Prontos Sucursos e in is istruturas ospedalieras.

In sa Domo de Comunidade traballant, in manera integrada e multidisciplinàriu, mèigos de meighina generale, pediatras de sèberu lìberu, ispetzialistas, infermieris de famìlia e personale amministrativu. S’istrutura garantit sa pigada in càrrigu de sa cronitzidade e de sa fragilidade pro mèdiu  de sa sanidade de initziativa, gestit s’atzessu a is servìtzios cun su Puntu Ùnicu de Atzessu (PUA), promòvet sa preventzione e s’amparu de sa salude de fèminas e minores, e favorit s’interessu ativu de assòtzios, malàidos e assistentes familiares.

S’ativatzione faghet parte de su prus ampru pianu de reorganizatzione de sa sanidade territoriale in Sardigna, chi dae pagu at superadu is obietivos natzionales istabilidos dae su PNRR e de su cofinantziamentu regionale. S’ìsula contat immoe 59 Domos de Comunidade operativas e 17 Ispidales de Comunidade interconnètidos in manera tecnològica, contra de is 50 e 13 prevìdidos a su cumintzu. In custu assentu nou, mentras is Domos de Comunidade rapresentant su primu isnodu pro sa cura e sa preventzione in su territòriu, is Ispidales de Comunidade acumprint una funtzione de ponte intermèdiu intre s’assistèntzia domitziliare e su ricòveru ospedalieri traditzionale. Custas istruturas intermèdias sunt dedicadas a is malàidos chi tenent biòngiu de curas a bàscia intensidade clìnica o de percuros de assentadura post-tràuma, unu coladòrgiu crae pro allebiare is presìdios ospedalieris e limitare is ricòveros impròprios.

Ulteriori informazioni

Ultima modifica