Festas religiosas in Ogiastra intre regordos edevotzione
Festas religiosas in Ogiastra intre regordos edevotzione: atòbiu cun Dot. Balloi
S’Ufìtziu Linguìsticu de s’Ogiastra est impinnadu in custas chidas in un’importante traballu de documentatzione de is protzessiones religiosas ogliastrinas. A traessu regortas fotogràficas, vìdeos, imàgines e intervistas, s’obietivu est preservare e avalorare su patrimòniu immateriale e is raighinas identitàrias de sa comunidade.
Sàbadu 18 is telecàmeras e is micròfonos de s’Ufìtziu Linguìsticu ant fatu tapa a Elini in ocasione de sa festa de Su Cramu. Meda is elinesos intervistados chi ant abertu su coro issoro, contende cun cummotzione profunda sa devotzione pròpia a sa Madonna e is regordos acapiados a sa festa de unu tempus.
Intre is medas intervistados amus tentu su praghere de fàghere carchi pregunta a dotor Carlo Balloi, cardiòlogu loceresu nòdidu de s’Ispidale Nostra Sennora de sa Mercede de Lanusè e ex sìndigu de Loceri. Pro su mèigu s’est tratadu de sa prima partetzipatzione a sa protzessione de Su Cramu de Elini: un’addòbiu chi no at bòlidu rinuntziare, bidu su percursu personale de acurtziada e iscoperta de sa fide e de su cultu marianu.
S’istòria de su dotore Balloi rapresentat un’intretzu intre professione e devotzione ispirituale. Corfidu dae un’aneurisma tzelebrale un’annu a oe, sa vida sua fiat apicada a unu filu.
A pustis de su recùperu difìtzile ma eficatze, dòighi meses a pustis, in sa crèsia de Santu Giuanne Battista a Irbono, a s’agabbu de sa missa, at donadu a sa Madonna s’istetoscopiu suo e at contadu a totus s’esperièntzia sua, de comente siat resèssidu a binchere su male gràtzias a s’agiudu de sa Madonna.
«Sa Madonna de is Gràtzias nde at a fàghere bonu impreu- at naradu -fortzis fintzas mègius de su chi nd’apo fatu deo, e at a ischire agiudare prus che totu sa categoria nostra, pro more chi nos diat semper prus fortza pro istudiare e pro nos agiornare e èssere galu prus passientziosos cun is malàidosnostros».
Ultima modifica