Su progetu “Su sardu in corsia” in su documentàriu in sardu “Abarru”

Eris a mangianu amus tentu su praghere de èssere intervistados dae su regista Andrea Deidda, chi pro contu de RTS – Radio Televisione Sarda est faghende unu documentàriu in limba sarda dedicadu a is persones chi ant istudiadu o traballadu fora de sa Sardigna e chi ant decididu de torrare a bìvere e a traballare in s’Ìsula.

S’atopu est istadu un’ocasione pro chistionare de su progetu “Su sardu in corsia”, de is initziativas fatas finas a como e de is progetos in programma pro favorèssere s’impreu de sa limba sarda fintzas in s’àmbitu sanitàriu.

Sa trasmissione, a tìtulu “Abarru”, finantziada cun su bandu Imprentas 2026 de sa Regione Autònoma de Sardigna, at a èssere trasmìtida a su cumintzu de su 2027 in su Canale 79 de su digitale terrestre.

Un’ocasione importante pro fàghere connòschere su progetu, is atividades suas e s’impreu pro sa valorizatzione de sa limba sarda in su mundu de sa sanidade.

Ulteriori informazioni

Ultima modifica